Кезиб дашту биёбонни, яна дарёга юзландим,

Висол орзусида Мажнун каби Лайлога юзландим.

 

Ғуборлар тинди қалбимда, санамлар синди қалбимда,

Биҳамдуллаҳ, яна ул дилбари яктога юзландим.

 

Кечиб ёлғончи доҳийдан, қизил туғли сипоҳийдан,

Бухорийдек Имому соҳиби фатвога юзландим.

 

Ватан ичра жаҳон топдим, муқаддас ошиён топдим,

Кичик дунёдан ўтдим, олами  Куброга юзландим.

 

Яна топдим нишонимни, жасур Соҳибқиронимни,

Демакким, ўзлигимни топдиму дунёга юзландим.

 

Навоий қасрига кирдим, саодат асрига кирдим,

“Хазойин ул-маоний” орқали  маънога юзландим.

 

Ҳумо қуш қўнди бошимга, яна ёш қўшди ёшимга,

Ҳумоюн сингари Бобур – улуғ Мирзога юзландим.

 

Қанотим бўлди истиқлол, баётим бўлди истиқлол,

Саодатдан яралган жаннат ул-маъвога юзландим.

 

Йигирма йилда юз йилни, босиб ўтган гўзал элни,

Юракдан қутлаб, эй Жаъфар, баланд туғрога юзландим.

Мушк хоҳам, мушки соро Тустй,
Мулк хоҳам, мулки Доро Тустй.

Ҳар чй гўям, ибтидои номи Туст,
Ҳар кучо бинам, нигоро Тустй.

Ошкорй, лек пинҳонй зи чашм,
Ноаён, лек ошкоро Тустй.

Дар мусалмонии ман сад куфр ҳаст,
Чун яҳуду ҳам насоро Тустй.

Ман ба зебоии олам ошиқам,
З-он ки ҳусни оламоро Тустй.

Ман Бухороро ба чон мепарварам,
Чунки бо шаҳри Бухоро Тустй...

Тошканд, 20 декабри соли 2010
 

Қанийди
Бир ёмғир ёғса:
Даладаги шийпонни
Шийпондаги чопонни
Ҳўллаб
Ёғсайди.

Саҳролар кезиб
Майсалар чизиб
Деҳқоннинг шукрона кўз ёшларидай
Томчилаб ёғсайди,
Гуллаб
Ёғсайди.

Булутлар юртидан —
Осмон қалбидан
Дилларнинг чанқаган ёзистонига
Илоҳий бир пайғом
Йўллаб
Ёғсайди.

Бир ёмғир ёғсайди...

Жаъфар Муҳаммад (с)Термиз, 1991

Рангларни бўяйлик.
Хоҳ қора, хоҳи оқ,
Ҳоҳ яшил, хоҳ қизил
Ҳидларни туяйлик.

Ҳали ҳам кеч эмас,
Якранглик бағрига
Беранглик бағрига
Гангиб
Сингиб
Кетаётган дунёни
Хилма-хил рангларга
Бўяшга улгуриш мумкин.

Рангларни бўяйлик.
Майли, қизил қизилдай,
Сариқ сариқдай,
Яшил эса яшилдай
Кўзга ташлансин...

Рангларни
Қандай бўлса, ўшандай бўяйлик.
Зеро, ҳар бир рангда
Бир маъно яшайди.
Ҳар бир рангда
Бир дунё яшайди.
Масалан, гумбазни қизилга
Боғни қорага
Осмонни яшилга
Сомонни кўкка
Бўяб бўлмайди.

Рангларни бўяйлик.
Тасаввурнинг кўкламида куртак очгувчи
Усуллар билан.
Юракдаги забардаст
Қўллар билан.

Рангларни бўяйлик.
Биров келиб, оппоқ
Альбомимизни
Бўяб-безашидан олдинроқ.

Рангларни бўяйлик...
Рангларни ўлдириб бўлмайди.
Ранглар ўлмайди...
 
Жаъфар Муҳаммад (с) Тошкент,

2010 йил 18 январь

Бир кеча ойдек тўлиб сен келмадинг, тонг отмади,
Бир нафас меҳмон бўлиб сен келмадинг, тонг отмади.

Кўзларингга жон тасаддуқ, кўзларим кўзгусида,
Ғунча янглиғ очилиб, сен келмадинг, тонг отмади.

Юз жароҳатни дилимга  бедариғ этдинг нисор,
Билмайин ёки билиб… Сен келмадинг, тонг отмади.

Орзулар шаҳрида ҳасратда куймоқда юрак:
Айланиб ё ўргилиб, сен келмадинг… Тонг отмади.

Жон лабимга келди-ю, эй ғунчалаб, сўнди умид:
Шўху шодон бир кулиб, сен келмадинг. Тонг отмади.

Ҳам қалам қўлимдадир, ҳам юз алам кўнглимдадир,
Ишқилиб, бир иш қилиб сен келмадинг: Тонг отмади!

Ўчди юлдузлар самода, ўчмади аммо чироқ,
Кетди Жаъфар эзилиб: Сен келмадинг, тонг отмади.

Жаъфар Муҳаммад (с)

Ҳар кишиким ул париваш зулфини ёд айлагай
Ақлу иймон тоғини бир пасда барбод айлагай.

Бир хиром этса агар ул сарвқомат боғ аро
Юз қиёматни санавбарларга бунёд айлагай.

Бир табассум бирла кўнглимни олар, ҳалвофуруш
Йиғлаётган болани ҳалво билан шод айлагай.

Топмаса гар жаннатул — маъвода Ширин ёрини
Дўзахийлар сингари Фарҳод фарёд айлагай.

Хастадил Жаъфар харобободида ҳайрондурур
Ким хароботийни нечук қайта обод айлагай?


Жаъфар Муҳаммад (с)